اسلحہ نہیں سانپ سے ڈرا کر لوٹ مار کرنے والی خاتون، تلاش جاری

اسلحہ دکھا کر یا چاقو سے ڈرا کر لوٹ مار کرنے کے بارے میں تو ہم آئے دن ہی سُنتے رہتے ہیں، لیکن کیا آپ نے سانپ دکھا کر لوٹنے والی عورت کے بارے میں کبھی سُنا ہے۔

ایسی ہی ایک عورت کی تلاش ہے بھارتی پولیس کو جو شہریوں کو اسلحے کے زور پر نہیں بلکہ سانپ دکھا کر اس کے خوف میں مبتلا کر کے لوٹ مار کرتی ہے۔

رپورٹ کے مطابق بھارتی ریاست تامل نادو میں پولیس نے خاتون کی تلاش کے لیے آپریشن شروع کر دیا ہے، پولیس کا کہنا ہے کہ یہ گمنام خاتون لوگوں کو سانپ دکھا کر بلیک میل اور لوٹ مار کرتی ہے۔

خاتون کی سانپ کے ساتھ ایک ویڈیو بھی وائرل ہوئی ہے جس کی بنا پر پولیس نے ملزمہ کے خلاف سوموٹو مقدمہ درج کرلیا ہے۔

پولیس کے ایک افسر نے بھارتی خبر رساں ایجنسی کو بتایا کہ خاتون خانہ بدوش اور سانپوں کی شوقین لگتی ہے، وہ لوگوں کو اپنا تعلق ویلوپورم سے بتاتی ہے۔

پولیس کا کہنا ہے کہ مذکورہ خاتون گھر گھر جا کر لوگوں سے پیسے اور کپڑے مانگتی ہے، جو اس سے انکار کرتا ہے اسے وہ سانپ سے ڈراتی ہے جس پر لوگ مجبوراً اسے پیسے اور کپڑے دے دیتے ہیں۔

متاثرہ شہری نے بتایا کہ ایک صبح خاتون گھر کی دہلیز پر آئی اور پیسے مانگے، جب میں نے اس سے انکار کیا تو اس نے ایک ڈبے سے سانپ نکالا اور مجھے ڈرانے لگی، مجھے مجبوراً خاتون کو پیسے اور کپڑے دینے پڑے، کچھ لوگوں نے اس منظر کی ویڈیو بھی بنائی ہے۔

واضح رہے کہ محکمہ جنگلات کے حکام نے بھی پولیس کے ہمراہ اس خاتون کی تلاش شروع کر دی ہے۔

Source

اس خبر پر اپنی رائے کا اظہار کریں